வொஷிங்டன் டி. சி நகருக்கு அருகிலுள்ள மேரிலண்ட் மாநிலத்தின் அண்ட்ரூ கூட்டுப்படைத் தள விமானநிலையத்தில், சீன ஜனாதிபதி ஸீ ஜின்பிங் தனது பாரியார் பேங் லியுவான் சகிதம் கடந்த புதன்கிழமை (23) வந்திறங்கியபோது, அவர் வெள்ளை மாளிகைக்கு வரும்வரை ஜனாதிபதி ட்ரம்ப் காத்திருக்கவில்லை.
மாறாக, அந்த விமானநிலையத்துக்கே நேரில் சென்று சீன ஜனாதிபதியை வரவேற்றார் ட்ரம்ப். 1962 ஆம் ஆண்டின் பின்னர் அமெரிக்க ஜனாதிபதியொருவர், மற்றொரு நாட்டின் தலைவரை விமான நிலையத்துக்கே சென்று வரவேற்பது இதுவே முதல் தடவை.
அங்கு சீன ஜனாதிபதிக்கு செங்கம்பள வரவேற்பு அளிக்கப்பட்டபோது, அமெரிக்காவின் எவ்.1 ரக குண்டுவீச்சு விமானங்கள் வானில் பறந்தன. எவ் 22 இரகத்தைச் சேர்ந்த 6 விமானங்களும், எவ்16 இரகத்தைச் சேர்ந்த 6 விமானங்களும் தரையில் வரிசையாக நிறுத்தப்பட்டிருந்தன.
மறுநாள வெள்ளை மாளிகையில், சீன ஜனாதிபதி தம்பதியினருக்கு மிக ஆடம்பரமான விருந்துபசாரத்தையும் நடத்தினார் ஜனாதிபதி ட்ரம்ப்.
சீன ஜனாதிபதி ஸீ ஜின்பின், இதற்கு முன் இறுதியாக அமெரிக்காவுக்கு இராஜாங்க விஜயம் மேற்கொண்டமை 2015 செப்டெம்பர் மாதத்திலாகும்.
அப்போது பராக் ஒபாமா அமெரிக்க ஜனாதிபதியாக விளங்கினார். 2016 அமெரிக்க ஜனாதிபதித் தேர்தலில் குடியரசுக் கட்சி சார்பில் போட்டியிட விரும்புவதாக போவதாக டொனால்ட் அறிவித்து 3 மாதங்களாகியிருந்தன.
அப்போது ஸீ ஜின்பிங்குக்கு ஜனாதிபதி பராக் ஒபாமா அளித்த அரச விருந்துபசாரம் குறித்து, பிரசாரக்கூட்டமொன்றில் விமர்சித்த டொனால்ட் ட்ரம்ப், 'சீனத் தலைவர்களுக்கு எதற்காக அரச விருந்துபசாரங்களை நடத்துகிறீர்கள்? அவர்களை மெக்டொனால்ட்ஸுககு கூட்டிச்சென்றுவிட்டு, அப்படியே பேச்சுவார்த்தை மேசைக்கு அழைத்துச் செல்லுங்கள்' என்று கூறியிருந்தார்.
ஆனால், அதன்பின் மீண்டும் ஸீ ஜின்பிங் அமெரிக்காவுக்கு இராஜங்க விஜயம் மேற்கொண்டபோது, முந்தைய வரவேற்புகளைவிட பிரமாண்ட வரவேற்புக்கும் ஆடம்பர விருந்துக்கும் ஏற்பாடு செய்திருந்தார் ட்ரம்ப்.
2015 ஆம் ஆண்டில், தேர்தல் பிரசாரக்காலத்தில், சீனர்கள், அமெரிக்க நிறுவனங்களை உளவு பார்ப்பதாகவும், தொழில்நுட்பங்களைத் திருடுவதாகவும் ட்ரம்ப் குற்றம்சுமத்தியிருந்தார்.
2017 ஜனவரியில் டொனால்ட் ட்ரம்ப் அமெரிக்க ஜனாதிபதியான பின்னர், அமெரிக்காவுக்கும், சீனாவுக்கும் இடையிலான இராஜதந்திர, வர்த்தக உறவுகள் மோசமடைந்தன.
கொவிட்19 பரவல் தொடர்பிலும் சீனாவை ட்ரம்ப் கடுமையாக விமர்சித்து வந்தார்.
2020 செப்டெம்பரில் வெள்ளை மாளிகையில் செய்தியாளர் மாநாடொன்றில் ட்ரம்ப் பேசுகையில், 'வேறு எந்த நாடும் சீனா போன்று எம்மை ஏமாற்றவில்லை. சீனாவுடனான கொடுக்கல் வாங்கல்களால் பில்லியன் கணக்கான டொலர்களை நாம் இழக்கிறோம். அவர்கள் அந்த பணத்தை எடுத்து தமது இராணுவத்தைக் கட்டியெழுப்புகிறார்கள்' என விமர்சித்தார். அவ்வருட அமெரிக்க ஜனாதிபதித் தேர்தலில் ஜோ பைடனிடம் ட்ரம்ப் தோல்வியுற்றார்.
2025 ஜனவரியில் இரண்டாவது தடவையாக அமெரிக்க ஜனாதிபதியான ட்ரம்ப், சில மாதங்களிலேயே உலகின் பல்வேறு நாடுகளுக்கு எதிராக புதிய இறக்குமதி வரிகளை அறிவித்தார். சீனாவுக்கு எதிரான ட்ரம்ப் நிர்வாகத்தின் 'வர்த்தகப் போர்' தீவிரமடைந்தது, அமெரிக்காவுக்குப் போட்டியாக, சீனாவும் அமெரிக்கப் பொருட்களுக்கான வரிகளை அதிகரித்து சவால்விட்டது.
இந்நிகழ்வில் ஸீ ஜின்பிங் புகழ்ந்து தள்ளினார் அமெரிக்க ஜனாதிபதி டொனால்ட் ட்ரம்ப். ஸீ ஜின்பிங்கை சிறந்த கனவான், மிகச் சிறந்த நண்பன் என்றெல்லாம் புகழ்ந்த ட்ரம்ப், சீனாவை மிகச் சிறந்த வர்த்தப் பங்காளர் என வர்ணித்தார்.
'ஜனாதிபதி ஸீ ஜின்பிங்கும் நானும் நமது இரு நாடுகளும் எதிர்கொள்ளும் பிரச்சினைகளில் மிகப்பெரிய முன்னேற்றங்களை அடைந்துள்ளோம்' என ட்ரம்ப் கூறினார்.
வெள்ளை மாளிகையில் செய்தி சேகரிப்பதற்கு சி.என்.என். உட்பட 3 அமெரிக்க ஊடகங்களுக்கு தடை விதித்திருந்த டொனால்ட் ட்ரம்ப், ஸீ ஜின்பிங்கின் வெள்ளை மாளிகை விஜயத்தின்போது, சீன ஊடகவியலாளர்களை, மிகச் சிநேகபூர்வமான ஊடகவியலாளர்கள் எனப் புகழ்ந்தார்.
இந்நிகழ்வில் ட்ரம்பின் கருத்துக்கள் மிகவும் இணக்கமான தொனியை வெளிப்படுத்தின. இது சீனத் தலைவரை தன்வசப்படுத்தும் அமெரிக்க அதிபரின் நீண்டகால முயற்சிகளை கோடிட்டுக் காட்டுவதாக இருந்தது என விமர்சிக்கப்படுகிறது
எவ்வாறெனினும், பெய்ஜிங்கும் வொஷிங்டனும் தங்களது வல்லரசுப் போட்டியை அமைதியான முறையில் கையாள வேண்டும் என ஜனாதிபதி ட்ரம்பிடம் சீன ஜனாதிபதி ஸீ ஜின்பிங், தெரிவித்தார்.
அதே வேளையில், செயற்கை நுண்ணறிவு, தாய்வான், மற்றும் ஈரான் போர் ஆகிய விவகாரங்களில் சீனாவின் நிலைப்பாடுகளை தெளிவுபடுத்த இந்தப் பயணத்தை ஸீ ஜின்பிங் பயன்படுத்திக் கொண்டார்.
இரு நாடுகளுக்கும் இடையே எந்தவொரு மோதலும் இல்லை என்பதை இரு நாடுகளும் உறுதி செய்துகொள்ள வேண்டும் எனவும் ஜின்பிங் கூறினார்.
மேலும், செயற்கை நுண்ணறிவு மனிதகுலத்திற்கு அச்சுறுத்தலாக இருக்கும் என்ற எச்சரிக்கைகளை ட்ரம்ப் தொடர்ந்து நிராகரித்து வரும் நிலையில், செயற்கை நுண்ணறிவின் வளர்ச்சி 'எப்போதும் மனிதனின் கட்டுப்பாட்டில் இருக்க வேண்டும்' என்றும் ஜின்பிங் எச்சரித்தார்.
ஆனால், பின்னர் வெள்ளை மாளிகையின் ஓவல் அலுவலகத்தில் அவர்கள் சந்தித்தபோது, தாய்வானின் சுதந்திரத்தை எதிர்ப்பதோடு, 'முன்னெச்சரிக்கையுடன்' செயல்படுமாறு ட்ரம்பை ஜின்பிங் வலியுறுத்தியுள்ளார்
ஈரான் போரை பேச்சுவார்த்தை மூலம் முடிந்தவரை விரைவில் முடிவுக்குக் கொண்டு வருமாறும் டிரம்பைக் கேட்டுக்கொண்டார்.
அமெரிக்காவும் சீனாவும் நவம்பர் 10 ஆம் திகதி முடிவடையவிருந்த, 'வர்த்தகப் போர் நிறுத்தத்தை' மேலும் இரண்டு மாதங்களுக்கு நீடிப்பதற்கு ஒப்புக்கொண்டுள்ளன.
இது தவிர, ஸீ ஜின்பிங்கின் அமெரிக்க விஜயத்தின் போது சில திருப்புமுனைகள், எதிர்பார்க்கப்பட்டன. ஆனால், இந்தப் பயணம் அதிகமாக ஒரு காட்சிப்பூர்வமான நிகழ்வாகவே அமைந்தது என விமர்சிக்கப்படுகிறது.
